يحيا الــعِــلْــم

باش نحكيلكم قصّة واقعيّة حكاهالنا مسيو القصّاب إلّي سألناه نهار من النهارات علاش ديما يقـول : يحيا العلم. قالــّــك يا سيدي بن سيدي :

راجل كبير في العمر ماشي للحج. الراجل هاذا منعزل عن كل ما هو تكنولوجيا عصريّة، يسمع بالطيّارة سمعان، قالولو راهي كرهبة كبيرة تنجّم إطّير في الهوا وتمشي بيك للسعوديّة في ضرف ساعات.

برّا ركب في الطيّارة مع الحجّاج الكل، في نصّ الثـنـيـّـة، تحصر مسكين. ما يعرفش إلّي فمّا تواليت في الطيّارة. شد روحو، دار على اليمين، دار على اليسار، تغصور، في الإخر، عيّط للمضيّـفة :

- شبيك يا بابا، حاشتك بحاجة ؟
- إيييه يعيّش بنيتي. بوك كبير وما ينجّمش يشد روحو اللّه غالب. تحصرت والرحلة ظاهر فيها مازالت طويلة. فمّـاشي سطل ولا حتّــى شطر دبّوزة بلاستيك نقضي فيها حاجتي بالسترة. وسامحني كان تعّبتك معايا بنيتي.
- يا بابا، لا باهيشي. هاو فمّا بيت راحة على ذمتك.

مشى الراجل إلبيت الراحة يلقا الدنيا منورة. قضى حاجتو وهمّم روحو وخرج يعيّـط للعباد :

- يحيا العلم. بيت راحة في الطيّارة. يحيا العلم.

العبرة من القصّة هاذي هي إنّو كل واحد فينا عندو علم ومعرفة محدودين بالأشياء وبالنظم والقواعد و إلى آخره من النِــعم الكونيّة.

الراجل هاذا ما تساإلش كيفاش تصنعت الطيّارة، كيفاش تنجّم إطّير والحاجات الكل إلّي يجعلوا من الطيّارة وسيلة نقل جبّارة وآلة عجيبة.

الراجل هاذا ما جلب إنتباهو من الحكاية الكل كان تواجد بيت الرّاحة في الطيّارة. راهو قعد باهت كيفاش جاء إلبالهم يعملو تواليت كاملة بكامل المستلزمات وإطّير في الهواء.

العلم حاجة هايلة. يحيا العلم