أحكيلي عليها يا بابا أحكيلي عليها

ـ بابا، اليوم في حصّة التاريخ، قرينا على الثورة التونسية، مازلت تِثبت عليها ؟

على سماعي كلمة الثورة التونسية، تبسّمت... تفكّرت أيّامات حلوّين ياسر. أيّامات صاروا عندهم 20 سنة. ا

ـ إييييه يا بنتي، وهوما الأيّامات هاكم يتّنساو ؟ عامتها عمري قريب ال22 سنة و حد ما كان يتصوّر إلّي في شهر من زمان، بن علي باش يطيح. حد ما كان يتصوّر إلّي في تونس، هالتطوّرات هذي الكلّها باش تصير. حد ما كان يتصوّر إلّي بعد 55 سنة، تونس باش تنتصر مرّة أخرى على إستعمار آخر أمّا داخلي. ا

ـ 22 سنة عمرك ؟ معناها تولدت في عهد بن علي و 22 سنة وإنتوما فرد ريتم ؟ ههههه

ـ أضحك أضحك. إنتي تظهرلك حاجة غريبة خاطر عمرك 14 سنة و حضرت على 3 رؤساء وهاو باش يولّيوا 4 في الإنتخابات متاع السنة، أمّا نحنا وقتها كانت عنّا حاجة عاديّة، و هي في الحقيقة موش عادية، حد ما كان ينجم يتكلم، حد ما كان ينجم يعارض، خلّاونا نشكّوا في العطار، في الحمّاص و حتّى في جيرانّا و صحابنا لا يطلعوا صبّابة، و من شيرة أخرى قفّافة الزين نهار كامل يبندروا باش يخلّيوا أصحاب العقول الصغيرة و النفوس الضعيفة تحسّ إلّي هو الأمثل و إلّي بلاش بيه، تونس تمشي في هاوية. تتكلّم كلمة هكّا وإلّا هكّا ؟ تذوق العذاب و تشبع بالحبس. عباد ماتت، و عايلات تشرّدت و صغيّرات تيتّمت، هذا آش كان صاير. ا

ـ ملّا حالة. وفي 20 سنة، تبدّلت برشا تونس ؟

ـ شوف بنتي، السياسة تبدّلت، الإقتصاد تبدّل، العباد بيدها و العقليات تحسّنت، الجهويّات تنحّات، الكلنا رجعنا توانسة و ما فمّاش فرق كبير بين الجهات ما عدا في تقاليدهم و إلّا في لهجتهم و إلّا في ماكلتهم، و التقاليد الكل و اللهجات الكل و الماكلات الكل عزاز غاليين ما دامهم توانسة... فيييين كنّا و فيييين صبحنا الحمد لله. أمّا فمّا حاجة قعدت هيّا هيّا، هواء تونس إلّي ما كيفو هواء. هواء تونس إلّي تنفّسو حنّبعل قبل ما يمشي يحارب الرومان. هواء تونس إلّي تنفّسو عقبة إبن نافع كيف أسّس مدينة القيروان و جعلها عاصمة للإسلام في إفريقيا. الهواء إلّي تنفّسوه جدودنا و خذاو منّو القوّة باش ما يخافوش قدّام المستعمر الفرنسي حتّى لين خرّجوه من بلادنا و أسّسوا الجمهوريّة. الهواء إلّي تنفّسناه عام 2011 و أنعشنا بيه روارينا باش لقينا نفس و جهد نعيّطوا بيه بن علي "ديڤاج". و هوّ بيدو الهواء إلّي تنفّسناه بعد الثورة باش لقينا العزيمة و القوّة و الصبر إلّي وصّلنا بيهم البلاد إلى الحالة إلّي يقتدا بها هذي. و هوّ بيدو الهواء إلّي تتنفّس فيه إنتي و صحابك توّا باش يكبر فيكم حب هالبلاد و تواصلوا المشوار و تاخذوا علينا المشعل. ا

غمّضِت البنيّة عينيها، تنفّست بالقوي، و تبسّمت... و تبسيمتها خلّاتني نحسّ إلّي تونس باش تكون بين أيدي أمينة إنشاء الله. ا

محمّد علي حكيمة

06/03/2011

التداول على العمل و الإعتصام لعدم الإخلال بالإقتصاد و النظام

بعد إندلاع الثورة و إسقاط نظام بن علي، تخلّص الشعب من جميع وسائل القمع و استرجع حقّه في التظاهر السلمي كما هو معمول به في جميع الديمقراطيات. ا

صحيح إلّي التظاهر عندو قوانين و لازمو يكون معلن عنّو مسبّقا لدى اللجان المختصّة، و لكن بما أنّو بلادنا تمرّ بفترة إستثنائية و ما كنّاش مستانسين بممارسة هالحق، ما إنّجموش نحكموا وإنقولوا إلّي جميع هالتظاهرات والإعتصامات ما عندهمش شرعية. بالعكس، مادام النضال لتحقيق الديمقراطية مازال متواصل، الإعتصامات لازمها تتواصل حبّينا وإلّا كرهنا. ا

ولكن، ما لازمش زادة نسلّموا في القراية و في الخدمة و نعتصموا على مدار الساعة وإنخلّيوا المسؤولين والعباد إلّي ضد الإعتصام يهدّونا بالإقتصاد وبالفوضى العارمة إلّي يمكن تتسبّب بيها الإعتصامات كيف تولّي عشوائية و غير منظّمة و الأهداف إلّي تدعو من أجلها ماهياش مسطّرة و الكلام هذا صحيح. ا

لذلك، في ضل التنسيق لهذه الإعتصامات و العمل من أجل إنجاحها و منحها شرعيّة تنظيمية لغياب الشرعية القانونية، في رأيي الخاص وإنشاء الله تكونوا موافقينني في الرأي، لازم الإعتصام يقوم على مبدأ التداول. يعني لازم يكون فمّا إعتدال بين الواجب الوطني إلّي هو العمل أو الدراسة و بين الحق إلّي هو التظاهر و التنديد بالمطالب التي يريد المتظاهرون تحقيقها. و هكذا يكون التنسيق بين المعتصمين لتحقيق الغرضين : ا

ـ لا يجب على المدارس و الجامعات و المستشفيات و جميع أماكن العمل أن تكون شاغرة و يعطّل مسارها

ـ و لا يجب على مراكز الإعتصامات أن تكون أيضا شاغرة و تكفّ الألسن على التنديد و التحاور و النقاش

أخيرا، اليوم مشيت، بعد ما كمّلت قريت الحصص متاعي في المدرسة الوطنية للمهندسين بصفاقس، للإعتصام القائم في ساحة الشهداء بباب القصبة بصفاقس، و فرحت إلّي مبدأ التداول معمول بيه. المحامين بعد ما يكمّلوا جلساتهم يجيوا للساحة و يشرعوا في تبليغ أرائهم و النقاش فيها، والأساتذة و الطلبة بعد ما يكمّلوا من التدريس و الدراسة كيف كيف... فمّا بالطبيعة إلّي ناصبين على طول الغادي و هذا من حقّهم، حد ما يدبّر فيهم، أمّا إنشاء الله يفهموا إلّي راهو النضال و خدمة الوطن ما يجيش بالكلام فقط، و ما يجيش بالفعل فقط، ولكن بالكلام و الفعل في آن واحد. تي نحنا أفراد الحكومة كان قعدوا يحكيوا ما غير ما يفعلوا، إنقولوا عليهم فاشلين و ماهمش قاعدين يقدّموا، و كان خدموا من غير ما يحكيوا مع الشعب، إنقولوا ضعاف في التواصل ولا زمهم يقولولنا على كل شيئ و يحكيولنا على مشاريعهم المستقبلية و نشكّوا إلّي هوما يغمّوا فينا. إذن لازم الشعب يتكلّم و يخدم باش الدولة تنجّم تخدم و تحقّقلوا مطالبوا وما تقعدش هيّ زادة تحكي و ماهاش قادرة تلبّي خاطر الفلوس إلّي باش نلبّيوا بيها المطالب ماهمش باش يهبطوا علينا مالسماء، أمّا باش يجيبهم الشعب بعرق جبينوا. ا

و إنشاء الله تونسنا بخير والسلام عليكم و رحمة الله و بركاته. ا

محمد علي حكيمة

03/03/2011