Braquage : Episode 1/2

البراكاجات والعنف ولّاو حاجة طبيعيّة في حياتنا اليوميّة. شكون منّا ما تبراكاش، ولّا حتّى حاولوا يبراكيوه؟ أنا واحد من النّاس صارولي برشا براكاجات (أمّا الحمد للّه ديما نخرج منها سلمات خاتر ديما البراكور يا إمّا فرخ فقسة مازال يتعلّم، يا إمّا واحد جايب فيها باندي ترعّشو يرعش). أمّا فمّا زوز منهم، باش نقعد نثبت عليهم طول عمري. البراكاج لول صارلي عامت السنة الأولى ثانوي (2005) في آخر العام. عامتها نحنا باش إنّقلوا إلى سوسة، معنتها آخر شهر لي في تونس العاصمة. أنا ماشي كي العادة للمعهد، تعدّيت إلى حمّاص الحومة شريت ڤازوزة وقصدت ربّي. خطفت دورة على اليمين باش نتعدّى إلى شهاب ولد حومتي وزميلي نمشيو مع بعضنا. وإذى بيك 5 ولاد حضّبوا وداروا بيّا والمعلّم متاعهم (مو ديما فمّا واحد يقود المجموعة، كان ضرب هو يضربوا هوما، وكان فصع هو يفصعوا هوما) قالّي :
- تراه أعطيني جغمة ڤازوز.
أنا مكنّي الرعب لحقيقة وحاولت باش نبدا نورمال :
- تفضّل (مدّيتلو الڤازوزة).
شرب جغمة وقالّي :
- عندك وقت؟ تراه شوفلنا الوقت.
آآآههه، مادام سأل على الوقت معناها البورتابل في خطر.
- ماعنديش وقت.
- تي أهوكا البورتابل في جيبك، شوفلنا الوقت الزّح.
- مافيشي شارج. مسكّر.
أنا قلت خلّي نستبلهو كيف مانعمل كلّ ما يبراكيوني فمّاش مايقول هاذا راسو صحيح ويقلّي برّا على روحك. أمّا السيّد هاذا ضاهر فيه تعلّم فازة جديدة إلّي هي الموووس. جبد عليّ موس وقالّي هات البورتابل.
- علاه نعطي فيك في البورطابل؟
أنا مازلت ماكمّلتش الجملة متاعي ونحس في الكف يرهوشني والموس في رقبتي والأربعة صحابو لخرين شادّيني منتالي.
- هاك هاك البورطابل (2100). خذاه وقالّي خليقتك ماعادش نحب نراها في الحومة هاذي (إلّي هي حومتي وموش حومتو).
أنا قلت خلّي نرجع للدار نكلّم الوالد. هبط معاية إلقدّام الحمّاص نلقى واحد ولد حومتي قتلو على البراكاج، قالّي شفتو توّا تعدّى هو وصحابو،إسمو داندون* وقال للوالد راهو قرا عندك في المكتب وتعرف عايلتو الكلّ. حاسيلو دلّنا على كل شيئ. الوالد قالّي برّا إنتي أقرا على روحك وأنا تو نتصرّف.
مشى الوالد للدّار متاعهم، يلقى بوه، راجل كبير ساق في البر وساق في القبر، ويلقى أختو زادة، بنيّة عاقلة وطلعت هي زادة تلميذة الوالد وقتها كان معلّم. حاسيلو البورطابل رجعلي والحمد للّه وسي داندون ربّي يهديه طلب السماح من الوالد وقالّو واللّه لا مشى في بالي إلّي هو ولدك، ولا راني مابراكيتوش (شوفو مصح رقعتو، واللّه حلال فيه كف كيما إلّي عطاهولي).
أمّا ماغاضني ملحكاية كان الڤازوزة إلّي ماكمّلتش إستمتعت بيها.
المرّة الجاية أنشاء اللّه نكمللكم القصّة الثانية مع محاولة براكاج، أمّا في سوسة...

-------------------------------------


داندون* : Dindon